Draumar.......

Jæja nú fer að styttast í aðgerð komnar eru 2 dagsetningar 6.eða 7. Mars þannig að ekki eru nema rúmar 3 vikur þangað til.  Hann Sigmar Örn ætlar að koma austur um næstu helgi að heimsækja okkur, vonandi að sú ferð fari betur en jólaferðin. Annars er mig búið að  dreyma svo mikið núna undanfarið að þegar ég vakna er ég alveg uppgefin  því þetta eru engir rólegheita ljúflings draumar nei nei það er allt á fullu sko og alltaf er ég eitthvað að vesenast, hjálpa til við flutninga velja jólagjafir fyrir ókunnuga eða bjarga Sigmari úr gíslingu  eða hjálpa til við eitthvað. Fólk sem ég þekki ekki neitt hvorki í draumi eða veruleika er að deyja og ég er að aðstoða aðstandendur, veit ekki alveg hvað þessir björgunar og hjálpar draumar eiga að þýða. Veit að ég hef haft töluverða björgunarþörf gegn um tíðina en fyrr má nú vera.

Snjór, snjór og meiri snjór

Hér er allt að fara á kaf í snjó, síðan á fimmtudag hefur þurft að moka bæði tröppur og stíg á hverjum degi til að komast frá húsinu, að ég tali nú ekki um bílinn hann er nú bara notaður svona alsparijóla......( enda ekki auðvelt að moka götuna mína sem að jafnaði er full af alls kyns vinnuvélum og vörubílum) á hverjum morgni þegar við vöknum er fennt í göngin sem mokuð voru daginn áður og tröppurnar fullar af snjó en ekki kvarta ég því mér hefur aldrei leiðst neitt sérlega mikið að moka snjó og fátt er eins frískandi og göngutúr í skítakulda og helst snjókomu beint í andlitið. Fyrir nú utan það að snjómokstur er hin besta líkamsrækt. Hallgrímur mokaði í dag svo ætli ég fái ekki að moka á morgun.

Fyrsta verkefnið í skólanum er farið frá mér sendi það núna rétt áðan  en það var um uppruna félagsfræðinnar. Mér líst mjög vel á þetta fag, það sem ég er búin að lesa lofar góðu en mér þykir félagsfræði mjög spennandi og gæti alveg hugsað mér að læra meira um hana en námskráin segir til um

Stórglæsilegt þorrablót.....

Jæja þá er þorrablóti okkar Seyðfirðinga lokið  og mikið eru  nefndarmenn glaðir, þetta er búin að vera mikil vinna en líka mikil gleði. Þegar það kom í ljós á miðvikudagskvöldi að við vorum búin að sprengja utan af okkur húsnæðið varð örlítið undarlegt andrúmsloft á æfingunni sem átti að vera því bæði vorum við í sjokki yfir því hvað ætti nú til bragðs að taka, hvað átti að gera við þá 50 sem ekki komust fyrir, ekki gátum við bara sagt við þá "nei því miður það er ekki pláss þið verðið að vera heima". Eins vorum við glöð og kát yfir þessari gríðarlegu aðsókn og mikið var um brottflutta Seyðfirðinga sem ætluðu að koma heim á blót. Óli bæjó var því kallaður á neyðarfund, það tók svosem ekki langan tíma að taka ákvörðun það var bara um eitt að ræða það þyrfti að flytja blótið yfir í íþróttahúsið. Þar með hófst gríðarleg vinna við að reisa nýtt svið taka niður leikmyndina og koma henni fyrir á nýja sviðinu með smá lagfæringum því nú vorum við komin með mikið stærra svið. Það þurfti að teppaleggja salinn fara um allan bæ og fá lánuð borð og stóla því ekki var nóg til í félagsheimilinu redda meiri mat prenta fleiri aðgöngumiða og söngbækur redda fatahengjum breyta fatahengismiðunum sem var búið að búa til, brjóta fleiri servíettur og klára að æfa skemmtiatriði já og svo þurfti auðvitað að taka niður ljósin búa til nýja ljósaslá koma slánni og ljósunum upp og finna annað og stærra hljóðkerfi. Við vorum nokkur sem fengum frí í vinnu á föstudeginum og fórum í það að raða upp borðum og stólum, dúka borðin og setja á þau diska, hnífapör, servíettur, og kerti.Hengja upp myndir inní sal og drykkjuvísur og skrípamyndir af af nefndarmeðlimum í anddyrið, græja barinn og skera niður mat í trogin sjóða rófur og kartöflur og búa til mús og stöppu. Allt gekk þetta upp með góðri samvinnu nefndarmanna og tókst blótið mjög vel við erum náttúrulega mjög montin af því að halda sögulegt blót því þetta er í fyrsta skipti sem það er haldið í íþróttahúsinu og verður þar vonandi um næstu framtíð. Þema blótsins í ár var gamli tíminn og bar yfirskriftina " Húslestur á þorra" sviðsmyndin var baðstofa og komum við með allskonar gamla muni til að skreyta með. T.d gömul skíði, skautar, rokkur, gömul hilla og bækur sauðskinnsskór ég saumaði skotthúfur á alla og við vorum í svörtum bolum, karlarnir með gyltum hnöppum en við konurnar með brjóstskrautið af upphlut. Við fengum mikið hrós fyrir fallegan sal og skemmtilegt blót, við gerðum grín að hinum ýmsu uppákomum í bænum á liðnu ári en held að við höfum ekki sært neinn með enda var það ekki ætlunin. hljómsveitinn Austurland spilaði svo fyrir dansi við mikla ánægju allavega var gólfið fullt allan tímann og þar dönsuðu bæði ungir og aldnir sérstaklega var gaman að sjá unga pilta dansa við ömmur sínar á áttræðisaldri .

Senn líður að Þorra !!!

og undirbúningur að blóti kominn á fullt skrið það er verið að semja, saga, negla, mála, hekla, prjóna ,sauma, skera elda, baka, sjóða, steikja, laga, hlæja, syngja, tala, skrifa, tala og tala aðeins meir en þó aðallega að hlæja og skemmta sér. Ég er alveg sannfærð um að líkt og undanfarinn ár verður þetta blót það langskemmtilegasta fyrr og síðar . (hógværð er ekki dyggð sem dugar í þorrablótsnefnd).Fyrir utan undirbúning að blóti gengur lífið sinn vanagang. Ungarnir mínir sem voru hjá mér um jólin komust norður til "skemmtilega" fólksins á gamlársdag og voru að vonum harla kátir þannig að við hjónakornin vorum bara tvö ein heima á gamlárs, það var svomsem bara fínt þó svo að ég saknaði þess nú aðeins að hafa ekki fleiri heima. Ég er búinn að fá stundatöflu fyrir vorönn og auðvitað á að byrja að kenna annað fagið sem ég er að fara í í sömu viku og við Sigmar erum að fara í aðgerð þannig að ég verð sennilega að skrá mig úr því fagi og fara í eitthvað annað. En það ætti nú alveg að reddast, allavega ekkert annað í boði en að vera jákvæður með það. Eins og ég sagði frá í síðustu færslu þá fór hann Sigmar á spítala á aðfangadag hann fékk svo frí yfir áramótin en mætti svo aftur á deildina sína 2. Janúar og var skorinn upp þá kom í ljós að hann var kominn með mikla samgróninga í garnirnar svo þeir voru í rúma fjóra tíma að skrapa og skafa garnir og leysa hnúta og flækjur. Hann er allur að koma til hægt og rólega, losnaði við morfíndrippið á fimmtudaginn og var mikið hressari og glaðari eftir það einnig töluðu hjúkkurnar um að það væri kominn smá litur framann í hann og á varirnar hann er líka farinn að sofa  betur hann fór svo í magaspeglun á föstudaginn og er með heilmiklar bólgur þannig að fyrst búið var að taka morfínið og minnka blóðþristingslyfinn var pláss fyrir magabólgulyf. Ég verð að seigja að mér finnst hann standa sig alveg ótrúlega vel í öllum þessum veikinda hremmingum sínum.Svo er það hún Hafdís systir sem græjaði fyrir hann herbergi og sagði það ekki vera spurningu auðvitað myndi hann flytja til sín og húm sægi um hann sem hún hefur gert það er alveg ómetanlegt að vita af þessum stuðningi hann hefur líka verið hjá Svanborgu og má bara vera þar sem hann vill held svei már þá að þær séu englar í mannsmynd þessar elskur.  

jólafréttir

Jólin jólin jólin tími ljóss og friðar sameiningar fjölskyldunnar rólegheita, fjölskylduboða, náttfatadaga, ofáts, viðsnúningi á sólahringnum og óróleika hjá kettinum. Flest af þessu höfum við fengið að upplifa um þessi jól drengirnir mínir skunduðu austur til að halda jól með mömmu sinni Þorvaldur og Ársæll komu með rútunni frá höfuðstað norðurlands 21.Des mikið skelfingarósköp var nú gott að sjá útilegudrengina mína sem þykjast vera orðnir fullorðnir og fluttir að heiman, þá var bara að bíða eftir Sigmari hann átti að koma með síðustu vél á Þorláksmessu við Hallgrímur brunuðum í héraðið að sækja piltinn og þarna kom hann horaður eins og rækja en alltaf jafn fallegur þá var ég búinn að heimta alla mína syni Klemens var líka kominn austur svo öll börnin okkar fimm voru mætt í sveitina að halda uppá hátíð ljóss og friðar. (Sigfríð er svo elskuleg að búa hér) Ekki vað Adam lengi í paradís (brasið alltaf á henni Evu) Sigmar var þokkalega hress að sjá en var nú samt svolítið hokinn þegar ekki átti að sjást til fögnuður þeirra bræðra var líka mikill að fá loksins að vera allir saman og ekki að hittast á spítalanum. Á Þorláksmessu kvöld um það leiti sem fólk var að búa sig í svefn fer minn maður að æla, sagði það ekki vera neitt væri bara þreyttur og ætlaði að fara að sofa. Á Aðfangadagsmorgun vaknaði ég svo við tilraunir pilts við að æla svo ég fékk hann á að koma með mér til læknis í bjartsýniskasti okkar beggja og von um að fá að vera saman héldum við að læknirinn gæti gefið honum eitthvað gott sem dygði fram að 26.Des en þá átti hann að fara suður aftur. Óli læknir skoðaði drenginn í bak og fyrir og hlustaði á sjúkrasöguna "jahá tvær vikur síðan þú fékkst ileus síðast þetta þýðir bara eitt -innlögn á spítala-" þetta voru hræðileg vonbrigði sem erfitt var að leyna en ekki ekki þýðir að deila við lækna eða dómara úrskurði þeirra þarf að hlíta þannig að Sigmar minn sem var búinn að hlakka svo mikið til að eiga jól með bræðrum sínum og mömmu varð að fara suður aftur á sjálfan Aðfangadag og leggjast inn á spítala, sem betur fer eru mamma og pabbi fyrir sunnan um jól og áramót svo amma hentist út á flugvöll að sækja prinsinn og koma honum á spítalann. (aaaarrrrrrrggggggg) Hún fékk svo að sækja hann rétt fyrir 6 og fara með hann til Hafdísar þar sem hann þurfti að fasta var skapið ekki alveg uppá það besta en hann stalst í smá jólagraut (3 skeiðar) sem var sá besti sem hann hafði smakkað og var hjá henni til að ganga tólf þá fór hann aftur uppá spítala eins mátti hann skreppa í jólaboð til ömmu og afa í Grindó og var hinn sáttasti með það. Þegar ég talaði við hann áðan þá var hann kominn í leifi fram yfir áramót en þá á hann að mæta aftur og fara í kviðarholsspeglun þessi þarmalömun er að verða svolítið þreytandi. En við sem eftir vorum fyrir austan erum búin að hafa það mjög náðugt Klemens og Sigfríð komu til okkar á aðfangadagskvöld eftir mat og pakka og aftur á jóladag í mat. Fríða og Hörður eru hér fyrir austan og komu til okkar í kaffi á jóladag og mat á annan í jólum Hallgrímur fór að vinna 27. og ég 28. þannig að vinnan hefur ekki verið að drepa okkur enda mikið búið að lesa og maula á konfekti laufabrauði og öðru góðgæti Þorvaldur og Ársæll eru komnir með ný viðurnefni og kallast nú einu nafni sófadýrin enda standa þeir varla upp úr sófanum nema rétt til að matast sofa og fara á klósett en það eru jú einu sinni jól svo ekki tekur því að jagast of mikið enda eru þeir ekki hér á hverjum degi. Sófadýrin stefna á að fara með rútunni norður aftur á morgun en spáin er ekkert allt of góð og kæmi mér ekki á óvart að þeir yrðu veðurtepptir hér um áramótin   hehehehe

Í dag er merkisdagur því systkini mín elskuleg Hanna og Einar Jón eiga afmæli í dag og óska ég þeim alls hins besta á afmælisdaginn og alla aðra daga megi gleði og gæfa umlykja þau um langa ævi.    

Fréttir úr sveitinni

Er búin að vera alveg þokkalega dugleg um helgina. Á föstudagskvöldið hittumst við leikskólakonur og enduðum jólavinaleikinn okkar, leikurinn er búinn að vera mjög skemmtilegur eins og venjulega fallegar orðsendingar og smágjafir í heila viku. Mörgum okkar tókst að dulbúast ansi vel því það þurfti að giska mörgum sinnum áður en rétti vinurinn fannst en sumar gátu þó í fyrstu tilraun. Mikið var talað og hlegið og borðað yndislegur endir á vinnuviku. Á laugardaginn fór ég í héraðið með Hirti og Mimie hélt áfram jólagjafaverslun og er bara sátt við þau kaup. Þegar ég kom heim fór ég að búa til konfekt ætlaði bara aðeins að gera ...smá... áður en við færum í laufabrauðið  hehe þetta smá fyllti stórann bauk og ég mér veitir ekki af liðsauka til að klára herlegheitin.. hvenær skyldi ég læra smá hógværð þegar ég er að búa eitthvað gott til  þannig að laufabrauðsgerðin dróst þar til eftir kvöldmat en þá hespuðum við þessu af og vorum bara snögg að því ég prufaði núna að nota hreina svínafeiti til að steikja uppúr aðallega vegna þess að boxið af henni var svo passlegt, ekki leist mér alveg á þegar það var opnað því lyktin var ekkert sérlega góð hálfgerð hrálykt mynnti mig á sláturhúsið og sláturgerð en bragðið af kökunum var mjög gott bara laufabrauðsbragð en ekki af feiti eins og ég finn svo oft og þegar búið var að steikja var ekki bræla í eldhúsinu mínu og í morgun var ekki hægt að finna að þar hefði farið fram steiking kvöldið áður. svo ef maður getur horft framhjá hrálykt af kaldri feitinni mæli ég með henni því eftirá er hún mikið betri. Í dag voru það svo Sörubotnar (krem og hjúpun eftir) og hrikalega djúsí súkkulaðibitakökur nammmmmi nammm held ég fari svo að hætta bakstrinum þetta er held ég alveg að verða gott eins gott að strákarnir komi og hjálpi mér við átið því ekki er hann Hallgrímur sá hressasti í smákökuáti.

Líkurnar á því að Sigmar komist austur eru alltaf að aukast hann er enn inni á spítala en vonast til að komast heim á morgun. Hann er allur að lagast og stíflan er sennilega losnuð svo hann þarf ekki í aðgerð (sem betur fer). Hef enn ekki heyrt frá Þorvaldi svo ég veit ekkert hvað hann ætlar sér að gera, hvort hann kemur austur eða fer út í eyju til pabba síns.

Líðanin hjá mér er öll að lagast eftir að ég kom mér til læknis og fékk þunglyndislyf. mér gengur betur að vakna á morgnana og er ekki eins döpur og áður, til að byrja með var kvartað undan því að ég væri svo þögul en það kom allt líka eins er ég ekki eins hrikalega utan við mig þó það komi náttúrulega fyrir. Stóra skrefið var náttúrulega að viðurkenna að ég væri orðin þunglynd en það var ansi stórt skref að taka og að viðurkenna að ég þarf ekki að geta allt ein og óstudd það er allt í lagi að fá hjálp hef reyndar verið að seigja öðrum þetta en það virðist vera erfiðara að fara eftir því sjálfur.

Innvortis jólahreingerning............

Jólahreingerningin á heimilinu fór gjörsamlega úr böndunum í gær, ég gerði ekkert annað en að drekka vatn og tæra bollasúpu í allan gærdag  kl 16.00 byrjaði svo drykkja á úthreinsunarlyfi ojjjjj heilir fjórir lítrar voru drukknir og eftir það var baðherbergið upptekið.... Þvílík skemmtun ...... en  ég varð alveg örugglega hrein á eftir. Í morgun átti ég svo að fara á Neskaupstað í ristil og magaspeglun en nei nei þegar maður býr á mörkum hins byggilega heims er ekki hægt að reikna með því að maður komist leiðar sinnar þegar maður á þarf að halda. Þegar við vorum að komast á fagradalinn var færðin orðin þannig að ekki sást út úr augum hvað þá lengra svo við snérum við og ég fór heim tandurhrein að innan en óspegluð. Ég sem var orðin þvílíkt spennt yfir því að fá slöngur þrædd í öll göt . Hvernig svosem heimilið verður þá er það klárt að húsmóðirin verður hrein að innan um jólin..

Rjúpnalaus helgi

Ekki tókst mínum ágæta manni að draga björg í bú núna um helgina, laugardagurinn var nýttur í þrif vegna veðurs svo eldhúsið okkar er orðið glansandi hreint og fínt (bannað að elda fram að jólum) og á sunnudaginn flúðu blessaðar rjúpurnar eitthvert langt í burtu (voru allavega hvergi þar sem hann var) karlgarmurinn kom heim ískaldur og genginn upp að hnjám rjúpnalaus  

Dagarnir í vinnunni hafa verið svolítið skrítnir ýmist er starfsfólk hálf bæklað og þess vegna heima eða í fríi kannski eins gott að minni bæklun var frestað fram yfir áramót þannig að hinar fá þá tíma til að jafna sig.. þegar ég kom úr fríinu kom vinur minn til mín með útbreiddan faðminn og sagði "ooooooo Anna mín ég elska þig svo mikið þú mátt aldrei fara aftur svona frá mér"   ekki amalegt að eiga svona aðdáanda  þó svo að hann sé hættur við að giftast mér hehehe. það fer að verða spurning hvort ég megi fara í aðgerðina eftir áramót þá þarf ég að yfirgefa kappann í 6 vikur.

Fríið búið ...............

Jæja þá er fríið búið og fyrsti vinnudagur líka.

mikið svakalega var nú gott að koma heim þó svo að fríið hafi verið mjög ljúft. Hitinn var mildur 25-30 gráður og andvari af hafi, þetta gat varla verið notalegra  ferðin fór aðallega í að gera ekki neitt fór einu sinni á ströndina og einu sinni í sundlaugargarðinn annars var tíminn notaður í að rölta um nágrennið kíkja á útiveitingahús borða góðan mat og hafa það náðugt í alla staði. Við fórum í eina skoðunarferð sem var bara fínt, við fórum upp á hæsta fjall eyjunnar sem heitir Teide og er 3,718 metrar y.s. við fórum ekki alveg upp á topp því til að komast þangað þarf að kaupa sér leyfi fyrir göngunni síðustu metrana en við fórum með kláfi upp í 3,550 metra þaðan var útsýnið magnað við sáum hálfa leið á heimsenda og hefðum sennilega séð alla leið ef ekki hefði verið fyrir mistur af Sahara eyðimörkinni þarna uppi var ekki nema 2 gráðu hiti svo það var eins gott að við tókum peysur með okkur.

set inn nokkrar myndir úr ferðinni  og afmælinu hans Sigmars

Farin í frí

Er farin í frí kem aftur eftir 2 vikur sólbrún og sæt njótið lífsins á meðan